බිය සැක දුරු කල අළුත් ගෑස් වෙළඳපොලට එයි

පාරිභෝගික කටයුතු අධිකාරියේ මාර්ගෝපදේශයන්ට යටත්ව ගෑස් සමාගම් අද වෙළෙඳපොළට ගෑස් නිකුත් කළා.

ඒ අනුව ලිට්‍රෝ ගෑස් සමාගම නව සිලින්ඩර තොග වෙළදපොලට මුදාහැර ඇත්තේ සුදු පැහැති පසුබිමක රතු වර්ණයෙන් යුත් එම සමාගමේ ලාංඡනය සහිත පොලිතීන් මුද්‍රාවකින් යුක්තවයි.

ලාෆ් සමාගමද සිය ගෑස් සිලින්ඩර්වල කහ පැහැති පසුබිමක නිල් වර්ණයෙන් යුත් සිය සමාගමේ ලාංඡනය සහිත පොලිතීන් මුද්‍රාවක් එක් කර තිබෙනවා.

මේ අතර ගෑස් සම්බන්ධ පිපිරීම් සහ අනතුරු සිද්ධි කිහිපයක්ම දිවයිනේ ප්‍රදේශ කිහිපයකින් අදත් වාර්තා වුණා. ඒ, ගාල්ල තල්ගම්පළ, පන්නල හෙට්ටිරිප්පුව සහ මාතලේ යටවත්ත යන ප්‍රදේශවලින්. මීට අමතරව බද්දේගම සහ අම්පේගම ප්‍රදේශයේ ස්ථාන දෙකකින්ද ගෑස් ආශ්‍රිත පිපිරීම් දෙකක් අද සිදුව තිබුණා.

එමෙන්ම කොස්ගම, කැස්බෑව, මීගොඩ, කොල්ලුපිටිය, කඩුවෙල, බලගොල්ල, රාගල සහ ගල්කිරියාගම යන ප්‍රදේශවලින්ද ගෑස් සම්බන්ධ අනතුරු සිදුව ඇති බවයි වාර්තා පළ වුණේ.