නිවෙස් තුළ ඉන්ධන රැස්කර තබාගැනීම ගැන සෞඛ්‍ය අංශවලින් හා පොලීසියෙන් යළි අනතුරු ඇගවීම්

රට තුළ පවතින ඉන්ධන අර්බුදය හමුවේ බොහෝ පිරිස් ඉන්ධන සිය නිවෙස් තුළ ගබඩා කර ගැනීමට පෙළඹී ඇතැයි වාර්තා වනවා. එවැනි ක්‍රියා අනතුරුවලට අත වැනීමක් බවයි සෞඛ්‍ය අංශ පෙන්වා දෙන්නේ.

බොහෝ පිරිස් එලෙස ඉන්ධන ගබඩා කිරීමට පෙළඹී ඇතැයි අනාවරණ වුණේ පිලිස්සුම් තුවාල ලැබූ පුද්ගලයින් ප්‍රතිකාර ලබාගැනීම සඳහා මේදිනවල වැඩිවශයෙන් රෝහල්ගතවීම හේතුවෙන් බව ද කොළඹ ජාතික රෝහලේ ජාතික පුහුණු කිරීමේ නිලධාරිනී පුෂ්පා රම්‍යාණි ද සොයිසා සඳහන් කළා.

පවතින අවදානම්කාරී තත්ත්වය හේතුවෙන් ඉන්ධන නිවෙස් තුළ ගබඩා කර නොගන්නා ලෙස ද කොළඹ ජාතික රෝහලේ ජාතික පුහුණු කිරීමේ නිලධාරිනී පුෂ්පා රම්‍යාණි ද සොයිසා මෙහිදී ජනතාවගෙන් ඉල්ලීමක් කළා.

නිවෙස් තුළ ඉන්ධන රැස්කර තබා ගැනීම හේතුවෙන් හටගත් ගිනිගැනීම් සම්බන්ධ සිද්ධීන් කිහිපයක්ම ඉකුත් දිනවල වාර්තා වුණා. එබැවින් නිවෙස් තුළ ඉන්ධන රැස්කර තබා ගැනීමෙන් වළකින ලෙසයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව ජනතාවගෙන් ඉල්ලීමක් කළේ.